Message
Sourav Hazarika
প্ৰতিজন সচেতন ৰাইজলৈ আহ্বান 🙏
আমি সকলোৱে প্ৰত্যক্ষ কৰিছোঁ যে বৰ্তমান আমাৰ সমাজ ব্যৱস্থা এক ধ্বংসাত্মক পথৰ দিশে গতি কৰিছে। হিংসা, হত্যা, অন্যায়-অত্যাচাৰ, শোষণ-দমন, দুৰ্নীতি, প্ৰৱঞ্চনা, অপহৰণ, ধৰ্ষণ, কুসংস্কাৰ আৰু অন্ধবিশ্বাসৰ দৰে ভয়াবহ সমস্যাসমূহে দিনক দিনে সমগ্ৰ সমাজখনকে গ্ৰাস কৰিবলৈ ধৰিছে। যাৰ ফলত সাধাৰণ নাগৰিকৰ নিৰাপত্তা আৰু মনৰ শান্তি সম্পূৰ্ণৰূপে হেৰাই গৈছে। প্ৰতিদিনেই ইয়াৰ বলি হ’ব লগা হৈছে হাজাৰ হাজাৰ নিৰীহ লোক।
কেতিয়া, ক’ত, কাৰ লগত কি দুৰ্ঘটনা ঘটে—কোনেও নাজানে। ঘৰৰ ভিতৰতেই হওক বা বাহিৰতেই হওক, আজি কোনো ক’তো সুৰক্ষিত নহয়। পুৱা বাতৰি কাকত বা নিউজ চেনেলত চকু দিলেই সমাজখনৰ এই কৰুণ আৰু নিষ্ঠুৰ ছবিখন স্পষ্ট হৈ পৰে, য’ত সাধাৰণ কথাতেই একোটা মানৱ জীৱন কাঢ়ি লোৱাটো যেন এক স্বাভাৱিক ঘটনাত পৰিণত হৈছে! আনকি আৰক্ষীৰ সন্মুখতে নৃশংসভাৱে লোকক হত্যা কৰা ঘটনাও আমাৰ নিজৰ অসমতেই দেখিবলৈ পোৱা গৈছে, য’ত সেনা-আৰক্ষীৰ লোকেও অকালতে প্ৰাণ হেৰুৱাবলগীয়া হৈছে।
এবাৰ গভীৰভাৱে চিন্তা কৰক—আমি কেনে এখন সমাজত বাস কৰিছোঁ? যিখন সমাজত জন্মদাত্ৰী মাতৃয়ে নিজৰ কনমানি শিশুক জাবৰৰ দমত দলিয়াই থৈ যায় আৰু পিতৃয়ে নিজ কন্যাক ধৰ্ষণ কৰাৰ দৰে পাষাণ ঘটনা শুনিবলৈ পোৱা যায়, তেনে এখন সমাজত আপুনি বা আপোনাৰ পৰিয়ালটো কিয় আৰু কিমান দূৰ সুৰক্ষিত? আপুনি এজন সাধাৰণ কৃষক-শ্ৰমিকেই হওক বা উচ্চপদস্থ মন্ত্ৰী-বিষয়াই হওক—বৰ্তমান সময়ত আমাৰ সমাজখনত কোনো এজন লোকেই সম্পূৰ্ণ সুৰক্ষিত নহয়।
সমাজত সঁচা অৰ্থত ’সচেতন লোক’ৰ সংখ্যা দ্ৰুতগতিত হ্ৰাস পোৱাৰ বাবেই এনেবোৰ অসামাজিক ঘটনা অস্বাভাৱিকভাৱে বৃদ্ধি পাবলৈ ধৰিছে। যদিহে আজি আমি সমাজখনৰ সুৰক্ষাৰ বাবে কোনো দৃঢ় পদক্ষেপ গ্ৰহণ নকৰোঁ, তেন্তে অতি কম দিনৰ ভিতৰতেই আমাৰ গোটেই সমাজ ব্যৱস্থা সম্পূৰ্ণৰূপে ধ্বংস হৈ পৰিব আৰু অনাগত দিনত আমি কল্পনাতীত ভয়াবহ পৰিস্থিতিৰ মুখামুখি হ’ব লাগিব।
অৱশ্যে বৰ্তমানৰ এই বিষাক্ত পৰিৱেশৰ পৰা সমাজখনক পুনৰ সুৰক্ষিত কৰি তোলাটো অতি কঠিন কাম, কিন্তু এই অসম্ভৱক সম্ভৱ কৰি তুলিব নোৱাৰিলে এই সমাজত আমাৰ বা আমাৰ সন্তানৰ ভৱিষ্যৎ জীৱনযাত্ৰা কেতিয়াও সুৰক্ষিত হৈ নাথাকে। সেয়েহে আমি হাত সাৱটি বহি নাথাকি, সময় থাকোঁতেই প্ৰতিজন সচেতন ৰাইজ আগবাঢ়ি আহিব লাগিব। সঠিক চিন্তা, পৰিকল্পনা আৰু গৱেষণাৰ মাধ্যমেৰে আমাৰ ভৱিষ্যৎ প্ৰজন্মৰ সুৰক্ষা নিশ্চিত কৰিব লাগিব।
আহক, আমি প্ৰতিজন সচেতন ৰাইজে জাতি, ধৰ্ম, ভাষা আৰু বৰ্ণৰ উৰ্ধ্বত উঠি একত্ৰিত হওঁ। নিজৰ সামাজিক দায়বদ্ধতা আন্তৰিকতাৰে পালন কৰি সকলোৰে বাবে এখন সুন্দৰ, শান্তিপূৰ্ণ আৰু সুৰক্ষিত সমাজ গঢ়ি তুলিবলৈ সংকল্পবদ্ধ হওঁ।
ধন্যবাদেৰে,
সৌৰভ হাজৰীকা
(মুখ্য স্বেচ্ছাসেৱক — সমাজ সুৰক্ষা বাহিনী)
